投資銀行裁員一浪接一浪，華華呢排搵啲金融才俊食晏，聽佢哋呻到樹葉都落晒。前日U仔（即係瑞銀）又派大信封，香港有4位分析員中伏。
線人同華華講，其中兩名被炒嘅分析員，聞說一個係跟Healthcare（醫療保健股），一個就睇開啲中小型消費股。不過據講，其中一位被裁嘅仁兄曾經喺返工時間公然覺覺豬，咁唔畀人炒就偷笑啦！
亞洲投行將勁炒人
線人同華華講，呢位年輕人曾經喺另一間外資行做過，喺行內以「hea」聞名於天下，成日發夢不特止，最經典係日光日白喺Office瞓着覺，被老細炳到上天花板，而且呢單料仲傳到成條街都知。
據講以佢當年嘅工作能力，居然被U仔招攬到，都算係一個傳奇，所以最終被炒收場，大家亦唔感到意外。
而金融才俊仲話，裁員潮肯定有排未完，除咗U仔、大摩呢啲陰乾式炒人外，近日又盛傳再有一間亞洲投行會大規模炒人，大家唯有醒醒定定，自求多福喇！
李華華
mailto:[email protected]