我求大俠近排都有睇三色台喺朝早重播嘅《楊門女將》，楊門班男人被奸臣害死，好彩有班女人撐住。估唔到皇家馬德里都係咁，佢哋喺球場無論係使真功夫定還是茅招，一樣贏唔到巴塞隆拿，幸好有靚女幫佢哋出番口氣。
碧基女友輸足幾條街
日前DTLUX.com選出全球50個最性感嘅女人，結果由皇馬前鋒基斯坦奴朗拿度（C朗）嘅俄羅斯模特兒女友艾琳娜得第一，而C朗皇馬隊友卡斯拿斯嘅靚靚主播女友莎拉卡邦拿路就得第3名；至於第2名、第4名同埋第5名，分別係西班牙電視節目主持AnnaSimon、西班牙歌手Edurne同埋美國女星施嘉莉祖安遜。另外，同皇馬後衞沙治奧拉莫斯拍過拖嘅西班牙明星AmaiaSalamanca都榜上有名，而且打入10大，排喺第9位。
等等先，點解唔見咗巴塞後衞碧基嘅哥倫比亞歌星女友Shakira嘅？Shakira都有份入選，但係佢只係得第18名，難聽啲講，真係輸幾條街畀艾琳娜同埋莎拉卡邦拿路囉。Shakira雖則係國際級歌手，但佢賣點係才華，拍埋去樣靚身材正嘅艾琳娜度，真係冇得揮，所以應該輸得心服口服。
美斯4月推自家紅酒
皇馬近幾年俾巴塞恰死，就算搵咗C朗同埋地上最強教練摩連奴過嚟，一樣改變唔到呢個宿命，其中今季仲要喺西超盃、西甲同埋西盃3次輸俾巴塞，令C朗同摩佬勁冇癮，搞到佢哋兩個心郁郁想返英超玩。皇馬球場內贏唔到巴塞，家陣喺球場上就靠班女人贏番次，但老講真，佢哋要咁樣先贏到巴塞，真係唔係幾光采囉。
雖則巴塞班球員冇皇馬球員咁識得揀女友，不過就好有生意頭腦。繼恩尼斯達有個酒莊，美斯亦同間阿根廷酒廠合作，仲計劃喺今年4月推出以佢命名嘅紅酒。唔知好鍾意飲紅酒嘅唐唐，會唔會幫襯美斯買番幾支呢？