上市公司為咗令記者朋友更了解佢哋嘅生意，都好鍾意送自己嘅產品畀大家試用吓。華華曾經收過粟米、奶粉、搖控車，甚至連底褲都見過，有時的確令華華幾無言。
每人一份禮物
噚日麵包股克莉絲汀（1210）搞新股上市記者會，華華就估佢可能即場請大家食吓西餅麵包咁，點知佢哋一嘢就拖咗一個印埋公司名「Christine」嘅旅行喼出嚟，裡面質咗一箱餅乾蛋糕，畀記者一人一個做禮物拎走，果然夠豪氣！之不過華華自問無強國人咁有毅力，無本事拖住一個大喼搭地鐵過海返公司，好多記者朋友似乎同華華有同一個諗法，結果婉拒佢哋好意，急急腳鬆人，不過，華華都可以提供相片為證㗎。