劉以達最近忙於宣傳新碟《希望之旅》及本月24日生日音樂會,昨日本報接獲讀者投訴,指他半夜2時30分「炸機」騷擾鄰居,更懷疑他精神有問題,平時甚少見人,但炸機就已有幾次,通常都會在夜晚11點後發作,至少十數分鐘,最長近一小時,因為是街坊一場才沒有報警。
阿達昨日在電話中表示:「我住村屋,可能比較應聲,最近出碟又要準備音樂會,成日要試聲,呢排可能多咗(炸機)同埋大聲咗,如騷擾到街坊,要向佢哋講聲唔好意思,咁喇大家街坊,以後我唔炸機畀大家聽,大家去買我張碟喇!」對於被街坊指他精神有問題,阿達笑謂:「想知我係咪精神有問題,24日大家嚟睇我音樂會咪知囉!同我一齊慶祝49歲生日。」
採訪:葉雪