城中兩大心臟科名醫謝德富同劉柱柏噚日變咗大紅人，事關新一期《壹週刊》爆料，話長和系主席李嘉誠上月曾接受通波仔手術，長實公關噚日晨咁早發出聲明否認，強調超人身體非常健康，由於報道話謝、劉兩人幫超人診症同做手術，傳媒於是轉向兩位名醫埋手，旁敲側擊。
謝德富早有準備，不斷話「唔關我事，我唔清楚」。至於識唔識李生，佢話「人人都識得李嘉誠，係李嘉誠識唔識你」，真係答得好。劉柱柏就簡單直接咁話「唔答得」。
長實份聲明都提到，超人同謝德富係多年朋友，不過「謝醫生亦有替李嘉誠先生之上輩及親友診症，李嘉誠先生亦曾陪同上輩就診」，硬喺要暗示李生唔係謝醫生嘅病人。