馮仁昭四圍超:天明寸盈盈等嫁等到黐 - 馮仁昭

馮仁昭四圍超:天明寸盈盈等嫁等到黐 - 馮仁昭

洪天明同湯盈盈噚日拍檔亮相鄭裕玲主持嘅無綫節目《財智達人II》,兩人老友鬼鬼,一見面即互寸,洪天明經常喺盈盈面前提起佢男友錢嘉樂,又話盈盈成個人投資喺錢嘉樂身上,搞到佢無言以對,洪天明更爆:「盈盈見到我老竇叫老爺,係咪黐線。」

錢嘉樂開期票話遲幾年先娶湯盈盈,搞到女友好尷尬。 資料圖片

洪天明話情人節會趕返港陪周家蔚。 資料圖片

情人節有着落

洪天明無時無刻提住錢嘉樂,話希望盈盈嫁得出,不過錢嘉樂話三、五年娶佢,加埋八年,等吓啦。講到情人節有乜嘢節目,洪天明就話14號會由日本趕返香港陪女友周家蔚,仲好寸嘴同盈盈講:「你男友(錢嘉樂)都有機會趕返嚟,不過唔係陪你。」之後繼續話:「佢會畀驚喜送嘢畀你,送你一程。」被狂寸嘅盈盈撒嬌話:「都話唔同佢一齊做訪問。」
洪天明下月娶周家蔚,籌備得差唔多,佢好想追龍B,但又怕太大競爭,樣樣要爭。另外,湯盈盈投資唔叻,十幾年前被鍾慧儀呃咗20萬,吸取咗好大教訓,現時唔會同朋友有錢銀轇轕,男友就另作別論。