呢個世界，除咗女明星對警鐘胸，仲有乜嘢抗衡到地心吸力？PSVita最新作《重力異想世界》，就係要你扮演失憶兼瞓下水道嘅老泥妹，使出反地心吸力絕招，四出打怪同解謎；天橋倒轉行、大樹打橫爬，上天下地處處都係立腳點，咁天馬行空嘅設定，應該連牛頓都激到翻生。
記者：徐影龍
攝影：蔡家輝
Model：Rika@GME淘女郎
趕喉趕命搵碇企
《重力異想世界》（GravityRush）由《SilentHill》、《死魂曲》設計師外山圭一郎揸旗，三年前原定開發成PS3Game，後來變成PSV獨佔。由公佈到試玩版推出，《GR》已成PSV機主必入遊戲，全因玩法極創新，勝過《無雙》、《RR》一堆翻炒續集。最突破係可隨意改變地心吸力嘅方向，如大廈外牆、火車路軌下方等，㩒吓個掣，世界即時倒轉晒，所有地方都可變成「地下」，主角就係利用呢點，四出搵騎樓底同橋底嚟行，消滅敵人兼引發劇情。最搞笑係其他途人會依舊若無其事，喺你頭頂繼續買餸講是非。
改變地心吸力有乜用？好多高樓、山洞，都要靠呢招嚟移動，聽落好易玩，不過系統會限制改變地心吸力嘅時間，即係要喺極短時間內「走嚟走去」，喺夠鐘前搵番個正常立足點，回過氣後先再一次倒轉世界、扮跳跳虎繼續周圍彈。單單學習靈活移動，已經玩到你手心冒汗，起初的確有點手足無措，不過一旦摸熟系統，你會發覺移動同攻擊原來好靈活，玩玩吓會愛上呢種嶄新系統㖭。
任務多多有排煲
故事講述失憶少女凱特，回復意識後驚覺自己有超能力，繼而「能力越大責任越大」，四出除暴安良重建世界。好老套？我都覺，旁枝情節反而仲有趣。好似某一章救完個平民咁，主角反被彈身形「微波」！好彩行貨有中文版，一路玩一路引發各式爛Gag，實在好過癮。目前打咗八章，越嚟越唔夠揪，惟有不停煲分支任務，儲多啲珍奇寶石升呢必殺技。任務類型五花八門，由執二手傢私、幫人搵仔乜都有，成績越好就越多寶石，升呢都快啲。遊戲整體確實做得唔錯，難怪《Fami通》評出近滿分嘅38分，力壓《Tales》同《無雙》成PSV最高分遊戲。唯一要注意，若果你連睇3D電影都嗌頭暈，打《重》時就最好食定暈浪丸喇。
《重力異想世界》中文版
機種：PSVita
類型：動作冒險
人數：1人
推出：2月9日
售價：$298（PSV卡版）$281（下載版）
＊初回特典附送中文設定資料集
