前電視藝人龔慈恩雖然已經息影咗一段時間，不過閒時都會客串拍吓電影，之前就客串過曾志偉嘅賀歲電影《2012我愛HK喜上加囍》。已嫁作人婦嘅佢目前全副心思就放喺一對仔女身上，前晚7點幾就見到佢開車同兩位小朋友去到大坑一間茶餐廳食晚飯。
當日做咗「無飯煮婦」嘅龔慈恩一入到餐廳就搵咗一個近窗嘅位坐，仲好識做讓咗個睇電視位畀對仔女，自己就專心喺度叫餸。經過5分鐘嘅選擇，佢叫咗3個餸，食飯嘅時候三母子有講有笑非常融洽，特別係囝囝好多嘢講，仲非常活潑，引得佢媽咪笑到鬼死咁開心。
相處融洽
餐飯食咗半個鐘有多，之後一家三口就行經一間便利店，阿仔提議買雪條食，點知阿媽好快就答應仲食埋一份。佢哋買咗三枝雪條，但係龔慈恩就花咗好多時間喺度揀汽水，最後阿仔忍唔住同媽咪講咗句「咁耐㗎」，順手就除咗自己頂帽跳起戴落媽咪度，引到龔慈恩哈哈大笑，睇嚟佢嘅親子教育都做得幾好，打成一片，之後三母子就食住雪條返車位攞車離開。