樓市成交一沉不起，上個月按揭登記宗數仲衰過沙士，做按揭銷售嘅經紀唯有勒緊褲頭食住粥水度日。華華收到幾個不謀而合嘅路邊社消息話，四大行之一嘅渣打最近解散咗一批外判合約性質嘅按揭經紀。
瑞銀亞太裁員35人
行內人同華華講，渣打好似做私人貸款同信用卡咁，前年搵招聘中介挖角，以較高佣金形式外聘咗一班熟手嘅按揭直銷經紀（DirectSales）團隊，估計至少有二十人，專落新盤做一手按揭客。呢班經紀喺樓市暢旺時期，確實跑到唔少生意，仲兼埋交叉銷售保險等其他產品㖭。
之不過家銀行連自己啲員工都隨時養唔掂，新客都留返自己做喇，渣打就要求呢班經紀打電話畀班舊客做加按，但冇乜成效，於是上月底就索性一次過解散咗隊team。渣打發言人承認有呢隊經紀，但就話冇聽過Cut咗隊team，亦冇講家仲有幾多人。
不過，講開裁員，華華聽講外資大行瑞銀最近又郁手，瑞銀喺亞太區裁咗35人，其中有4個員工係香港區分析員，同4個香港同新加坡技術人員，但係相比起大笨象放風炒3000個員工，呢啲真係濕濕碎啦。
李華華
mailto:[email protected]