提防小手！禮拜日意甲前5球隊全部失分，AC米蘭主場0:0悶和拿玻里，全場最精采一幕嘅係伊巴謙莫域一招「蠱惑的手」。近年脾氣收斂唔少嘅伊巴，喺比賽末段扮晒去勸交，疑似去攬住隊友洛斯連奴點知其實係去摑對手一巴。伊巴交足戲但都係逃唔過球證法眼換嚟一面紅牌，隨時因為咁冇得喺月尾對祖雲達斯嘅聯賽大戰上陣，代價認真大。
扮搭膊頭變兜巴星
AC今季遇強越弱，禮拜日場波主場迎戰拿玻里，睇到羅賓奴連單刀都入唔到，就知繼續冇運行，結局最後0:0收場。可能伊巴見到班隊友咁唔爭氣自己都冇乜癮，趁有機會一於搞吓事。踢到64分鐘，AC中場洛斯連奴同拿玻里守將艾朗歷卡有衝突嘈交，唔關事嘅伊巴走埋去，伸手兜過洛斯連奴後腦就摑咗艾朗歷卡一巴掌，之後扮晒嘢踏住洛斯連奴膊頭。艾朗歷卡儍更更俾人星咗巴都唔知咩事，仲以為係洛斯連奴郁手，向對方還手。
伊巴呢招蠱惑兜巴星，功力幾乎拍得住我求大俠嘅無影手，但係惡人自有惡人磨，球證睇到佢嘅惡行二話不說即刻出紅牌趕佢出場。
隨時停3場鬥唔到祖記
伊巴呢次攞紅牌，如果俾賽會視為「暴力行為」，將會被罰停賽3場。AC米蘭之後第3場聯賽嘅對手正正係榜首祖雲達斯，家佢哋踢多場兼少祖記1分，兩雄相遇如果冇埋伊巴都幾大件事，事關佢係聯賽幫AC入咗15球咁多。家陣傷兵咁多，已經冇乜邊個可以孭起入球重任。禍不單行，上年11月突然中風嘅卡斯辛奴，佢嘅神經科醫生話呢位AC中場基本上冇機會喺今季復出。
昔日臭馬伊巴謙莫域，雖然近年喺場上搞事情況已經大大減少，但仍然會間中發作。上季意甲AC主場對巴里場波伊巴無端端打人，結果令佢喺對國米場大戰停賽；之後一復出嗰場波又因為鬧球證再攞紅牌。如果伊巴真係冇得喺月尾出場對祖記，AC輸埋嘅話，聯賽錦標真係凍過水，有伊巴必贏聯賽冠軍呢個金漆招牌隨時都危危乎。