星展銀行98年收購咗台灣寶華銀行後，噚日正式喺靠近台北市政府嘅旗艦店舉行本土註冊典禮。變身子銀行後，自然邀請哂寶島嘅政經界巨擘來臨午間酒會。
ECFA協議下，台灣誓要把握兩岸經貿同金融商機，據司儀小姐話，剛成功連任嘅台灣總統馬英九，原本想親身出席典禮，支持一下星展盛事，可惜噚日完宵佳節，亦適逢新舊內閣交接吉日，小馬哥分身乏術，大家只能緣慳一面。
不過馬總統人唔到禮都到，華華喺酒店宴會廳門口，發現總統馬英九同副總統蕭萬長署名嘅巨型花籃(圖)，仲有立法院院長王金平、同寶島企業龍頭及銀行老總送贈嘅花籃，排滿走廊，都算畀足面星展嘞。