踏入2月，好多上市公司都準備出業績，當中股東眾多嘅獅子行一定最有睇頭。作為一間環球大銀行，佢嘅每一個舉動都可以成為焦點，究竟佢27號公佈業績當日會做乜講乜，英國嘅《獨立報》就幫佢做咗個預測。
首先講佢盤數，《獨立報》估佢舊年稅前盈利18億美金，不過不失咁啦。而另一個焦點就梗係總部位置啦，照佢哋估計，記者會旁敲側擊咁問滙控係咪會搬總部。不過，《獨立報》認為獅子行根本就好鍾意倫敦，所以估班管理層一面讚倫敦嘅優勢，另一面又唔想得罪香港股東情況下，就一定會答「我哋會定期檢討總部位置」。諗落佢哋班高層又真係答咗好多次呢個答案……
除咗預測之外，《獨立報》仲向獅子行抽水；話以前滙控出業績，一班管理層會出嚟見傳媒，仲會同傳媒喺飯局講吓業績同去向。時至今日，得番個電話會議，管理層又唔肯見人，《獨立報》估計，因為咁樣易啲管住班傳媒，同埋家陣咁嘅時勢，班管理層應該唔敢出嚟見人，費時畀人插餐懵。