福祿壽前晚在紅館開騷，繼續發揮扮嘢本色，在台上大玩早前辱罵港人是狗的孔慶東，指他應該拿着DOG牌去D&G門口拍照，一定吸引好多港人合照。三子在台上宣佈暫時解體，祥仔泣不成聲。
阮兆祥、王祖藍和李思捷前晚在紅館舉行一場「那些年，爆笑不離3兄弟演唱會2012」，無綫高層樂易玲、梁家樹、陳智燊、陳友、李亞男、王君馨、苟芸慧等均有到場欣賞，全場逾萬座位爆滿。福祿壽穿上代表無綫台徽的紅綠藍三色進場，獻唱多首經典金曲，又化身劉德華、梁朝偉、湯鎮業、鄭伊健和林峯等登場，與嘉賓黃日華、苗僑偉、薛家燕和阮小儀大放笑彈。
秋官壓軸
福祿壽最叻扮女人，他們穿上大肚泳裝在「香港孕婦小姐總決賽」中論政，擔任司儀的金剛以半鹹淡廣東話將來港產子的孕婦說成「淫婦」。祖藍踎在樓梯邊綁鞋帶，金剛叫他合埋腳，祖藍笑說﹕「我好似新政府部門一樣，門常開。」金剛再問：「孔慶東鍾意用乜英文字母？」祖藍搶答﹕「DOG，如果佢攞住DOG牌去D&G，一定有好多人同佢影相。」
鄭少秋擔任壓軸表演嘉賓，經常扮秋官的李思捷甫見他即半跪說：「拜見秋官，見到你好似照鏡咁。」秋官直言見到他們好開心，他說：「下次我開騷都搵你哋，唱幾多場都唔覺攰。」尾聲時，祖藍突然宣佈福祿壽要暫別一段時間，他說：「今次演唱會得一場，我哋決定宣佈暫別演唱會！未來大半年，大家會分開各自各工作，兩年幾以嚟見佢哋多過見我阿媽，多謝大家對我哋嘅支持。」思捷說：「多謝上天畀我識到兩個好兄弟，雖然中間會有拗撬，但對事不對人，三兄弟感情好好。」
祥仔勁喊
祥仔在旁喊到收唔到聲，被祖藍取笑：「係汗定係喊呀？」三人最後安歌獻唱《那些年》。慶功宴上，眾人開香檳慶祝，祥仔被笑眼淺，他說：「忍咗好耐，《兄弟》係我哋心聲，多謝祖藍填呢首詞。」據悉除李亞男外，思捷女友春卷和祥仔女友都有捧場，但思捷卻避談，要祥仔代答：「佢份人好低調，想專注工作，在心中啦！」
採訪：何慧斯
攝影：仇志德