上周五醫藥股狂升，皆因內地衞生部發表2012年衞生工作要點，內容強調今年將擴大國家基本藥物制度實施範圍，提出基本藥物優先使用嘅鼓勵政策，要重點做好農村和邊遠地區基本藥物配送工作。
09年8月，內地開始啟動基本藥物制度，遴選確定咗307種基本藥物，當時已刺激醫藥股爆升，但呢個制度一啲都唔Userfriendly，好多平民化嘅藥品喺名單都冇得揀，醫院冇得採購。今次衛生部擴大實施範圍，就係想納入街坊藥品，預計分銷商國藥（1099）、上海醫藥（2607）會係贏家，聯邦制藥（3933）嘅街坊藥亦可得益，高檔藥品嘅中國生物製藥（1177）就冇咁受惠。
至於重點做好農村和邊遠地區基本藥物配送工作，隨時係「藥品下鄉」，絕對唔講得笑。
2011年係藥股黑暗嘅一年，之前內地部份藥品定價天咁高，中央唔想百姓捱貴藥，2010年底發改委開始推出限價措施，藥股中晒招，舊年上半年逼住降價，搞到收入升、毛利率跌，盈利大縮水。聯邦有40%嘅抗菌藥物制劑受限制措施影響，部份膠囊藥品要限價，即使重組人類胰島素產品推出都未能力挽狂瀾，2011年上半年收入升9.6%至33.74億元，毛利降4%至11.99億元，純利跌36%至3.08億元，每股盈利23.6仙。下半年藥業環境依然惡劣，盈利分分鐘較上半年打個折，券商平均預測下半年每股盈利降至15.3仙，預測全年經調整後每股盈利42.7仙。
盈利躍進可睇6元
另外，聯邦短債壓力沉重，6月底短債30億元，息率1.8至8.35厘，結果要發行7.9億元人民幣可換股債券，短債轉長債，息率7.5厘，利息開支大增。計埋換股債潛在形成嘅攤薄因素，2011年市盈率為14.7倍。
不過，最黑暗時候過去，藥品降價舊年業績已反映，今年再獲政策支持，相信毛利率可保，收入顯著增長，盈利好大機會大躍進。自從去年11月聯邦發債導致股價大跌後，慢慢形成圓底，近期成交逐步增加，係完美圓底走勢，靚絕，上周五爆升只係開始，短線睇6元，中線睇20倍PE嘅7.50元。
晉佳
本欄逢周一、三及五刊出