一隻《芒亨》令3DS銷量再嚐甘露，跟手再嚟多隻日系名牌《生化危機》撐場，聲勢應該又再翻一番。今集除超Sexy長腿新女Jessica，拎起手槍、機關槍幫手怒殺喪屍，仲加多一名谷胸女屍王，會時時刻刻從後襲擊你，玩到你又心寒，又血脈沸騰，認真攞命！
記者：陳國輝
巨乳女屍王 夜半哼歌
記得上集仲係PS3嘅《生化5》，因為佢由傳統驚嚇冒險，變成一隻普通動作Game，搞到我哋呢班生化迷極之唔Like！好彩，3DS版總算補番隻鑊。遊戲開端已身處幽暗嘅鬼船，氣氛頗為沉重，但最嚇人嘅情節其實由第15分鐘經已出現，當時主角Jill發現女角Rachel被喪屍襲擊，由於隔住特厚防彈玻璃，只能睇住佢白白枉死。如果大家有留意去年TGS片段，應該會記得呢名女性，佢就係事業線深不見底嘅Rachel！佢死後唔止化身為性感又殘酷嘅超級女喪屍，佢仲會周不時出現喺某個角落，突然從後追擊你；更令人心寒係，即使你見佢唔到，但卻又經常聽到悽厲嘅夜半歌聲，難怪連機迷都話呢位小姐最得人驚！
除咗美艷喪屍王，BSAA成員仲加入一名長腿索女Jessica。講到賣弄性感，佢未必及得上Rachel，但超貼身制服誘惑，加埋拎槍殺喪屍嘅英姿，又幾冧死仔嘅！
操控升呢 浴血場面多
好多Fans已經對《生化》系列產生「離心」，原因之一，就係唔鍾意第一身射擊呢種玩法！即使今集沿用第一身進行，但轉為3DS版，立體畫面加上改良後嘅操作，感覺又唔同晒！呢集3D效果可謂用得其所，特別一讚係失血過多嗰陣，畫面四周圍會血迹斑斑，立體感超強；至於PS3版為人詬病嘅無法邊行邊射嘅問題，今集只要按實L和R，就可以一路瞄準一路向前行，再加埋觸控副屏幕改變視點，就唔怕喪屍突然跳出嚟！
另外，今集仲多咗件類似金屬探測嘅儀器，只需喺畫面周圍Search一次，隱藏嘅子彈、藥物又或者開門鎖匙，都唔怕睇漏眼，對過關相當有用。
《生化危機：啟示》
機種：任天堂3DS
類型：驚嚇＋冒險
開發商：Capcom
售價：約$500
