今時今日做學者，唔單止要飽讀詩書，仲要識得風水命理。港大民意研究計劃總監鍾庭耀最近俾中聯辦狂砌，佢噚日出席一個論壇時話，上次港大民調風波發生喺2000年，佢遭施壓叫停特首同高官民望調查，估唔到事隔12年，同樣係龍年，又再因民調唔啱聽，俾中聯辦宣傳文體部部長郝鐵川狂插，惟有慨嘆一句，「我可能同龍仔有相冲」。
成名玩自嘲
睇番紀錄，龍年真係不利於民調。好似再對上次龍年，即1988年，港英政府成立民意匯集處，就八八直選進行民意調查，指有七成市民反對直選，同坊間意見落差好大，被批評玩弄民意，歪曲事實。鍾庭耀語重深長咁話，希望到2024年下一個龍年，唔再發生民調風波。
遭左派報章圍攻嘅學者仲有科大教授成名，俾左報點名批評佢係「學術界長毛」。一直以光頭look示人嘅成名幽默感十足，「一睇我個樣就知唔係喇」，惹得哄堂大笑。經常撰文論政嘅同系另一副教授馬嶽就甩難，仲未受批。佢同事蔡子強話，馬嶽自己都大惑不解，「佢會閉門反思己過」。