蔡卓妍（阿Sa）與陳偉霆（William）拍拖大過天，前晚二人到朱薰位於鯉景灣住宅BBQ，有上址住客投訴濃煙密佈。阿Sa昨日出席時裝騷時解釋，未到達目的地已知收到投訴，強調一年才有一次此類活動，不過她亦為造成滋擾表示不好意思，並揚言會叫朱薰留意。
蔡卓妍、謝婷婷、周麗淇、文詠珊等昨日現身山頂出席Moschino時裝活動，而郭秀雲的兒子錢景峰則投身公關公司做實習。阿Sa近月與男友陳偉霆甜蜜遊蘇梅後，二人前晚拍拖到商台DJ朱薰位於鯉景灣住宅BBQ，有上址住戶向本報投訴濃煙密佈，卻投訴無門。記者向阿Sa求證此事，她亦承認：「好似係，其實朱薰七點幾已經收到投訴，嗰時我哋都未嚟，朱薰話一樓平台係可以燒嘢食，我都唔好意思，會叫屋主留意吓，對上一次燒都係前年，放心啦，我哋唔係成日燒。」
公契列明可BBQ
朱薰在電話回覆本報查詢時表示：「入住呢間屋嗰陣，已好小心check過公契，清楚寫明可以燒嘢食。如果引起鄰居不滿，真係唔好意思，鄰居應該守望相助，如有鄰居受到影響，歡迎鄰居去我屋企親自同我講，再次向受影響的鄰居道歉。」
對於有相士批阿Sa與William今年會秘婚，她笑言：「秘過一次仲秘，下次會明婚，自己未計劃結婚，呢個moment拍拖好自由。」問到會否未婚生B，阿Sa笑言：「我未到高齡產婦，可能35歲先生，有咪開心接受，自己想一步一步，結咗婚都享受吓婚姻生活。」
婷婷懶理鋒芝復合
有傳錢景峰已跟隨後父龐傑姓氏，改名叫龐景峰，他表示：「個名改咗6年，姓龐又好，姓錢又好，我係龐錢景峰，我不嬲都叫佢老竇，係去英國讀書時改。」而婷婷則透露農曆年有到霆鋒家拜年，不過未有遇上張栢芝，問到霆鋒態度軟化有望復合？她表示：「冇問佢，我哋只係同爹哋、媽咪食嘢，同兩個小朋友跳MichaelJackson舞，媽咪不嬲都唔理，由佢哋一齊分開都冇畀意見，霆峰性格比較獨立。」
採訪：顏英儀
攝影：陳志嵐