一月三十一日「蘋果」B14版有添馬男一篇"ThisTimeisNOTDifferent"，講扶貧治標不治本，民粹主義當道，十分啱聽，今天香港就是如此：「親中政客蔑視殖民地官僚所建立的『香港發展模式』，泛民政客在社工教師及選舉民粹主導下，脫不了福利主義尾巴，傳媒則道德主義掛帥，以劏房及推紙皮老人新聞，取代客觀政策分析，以顯示政府不仁。」
特首競選參選人之中，何俊仁飽受社工教師影響，梁振英與親中政團越行越近，眉來眼去，陳婉嫻不停貶英年揚振英，已見端倪，佢兩位是但一位上台，香港特區政府嘅政策都會與社會主義接近。近日工聯會大老鄭耀棠發聲，聲言要梁振英與唐英年支持標準工時立法，否則兩個都攞唔到工聯會選委嘅票，擺明威脅啫，睇吓雙英之中，邊一位會率先向工聯會投降先，梁振英已豁了出去，冇工聯會民建聯嘅票，可能連候選人都做唔到，好有機會第一個向工聯會跪低；唐英年即使冇工聯會民建聯嘅票，仍可入閘，況且所有商界商會都反對標準工時，唐生識得抉擇啩？
標準工時不可行，早有論述，今日歐洲危機重重，經濟不景，與標準工時不無關係，反觀美國，工會勢力日弱，工會只在舊經濟體系內（鋼鐵、汽車、碼頭等行業）有較大勢力，在新經濟體系（服務、高科技電腦）嘅影響力較微。最高標準工時並不盛行，矽谷僱員經常工作至深夜，晨昏顛倒嘅，故此美國高科技業以創意加勤奮，長期執世界牛耳，可以支撐美國經濟不死。在香港，實施標準工時會帶來無數管理上之麻煩，對工人之收入亦無益處，左派工聯會與泛民工黨係要在此議題上爭威風，最終會損害香港。
講起本書ThisTimeisDifferent，上次在中大晚宴見到諾貝爾獎得獎人PeterDiamond教授，佢就曾經向在座人士推薦呢本書，指書內資料詳盡，又對八百年來之西方炒賣泡沫一一分析，以史為鑑，任何政府嘅財經決策官員都應該一讀。「今次唔一樣」我地經常掛在口邊，八十年代末台灣加權指數炒到萬三點，台灣朋友對左丁山堅持「今次唔一樣，我地台灣與香港七四年唔一樣！」唔，今時今日，台灣只在七至八千點浮沉，加權距離一萬點，仲有排行呀，每次有泡沫，次次一樣至真，就係一定爆煲收場。