銀建國際（171）有唔少中資股投資，博否極泰來，有得諗。銀建去年6月底，手頭中港股票投資嘅賬面值14.94億銀，涉及祖國嘅有中國西電（滬：600179）、中青寶（深：300052），及北京金隅（滬：601992）。老老實實，祖國股市喺上年無表現，係下半年，兼一路向下，銀建手頭呢批股份，亦唔多醒神，嚟緊2011年度成績表，銀建亦未必靚仔。但要咁睇，呢批股份跌近谷底，基數已經縮細，再跌對銀建影響有限，但一爆上，就風光無限。以呢批股份上年6月賬面值計數，每10%增值，銀建就額外增值1.5億銀，咪話唔肥仔。呢轉輕輕收集銀建，擺中線，博翻半番到2.7元，銀建PB未有耐上到1倍水位。
東方文化有鑊氣
中國東方文化（2371）前身直真科技，呢期轉型媒體業，就收購湖南移動電視一事，仲等緊發通函及EGM通過，即係話，嚟緊日子，呢壇製作進展，會係短線誘因。Beforethat，東方文化挨住08年、09年嘅海嘯低位價，對上兩個交易日，鑊氣漸現，短打博升20%到0.44元，PB1倍多少少，仲未炒過籠。
錢雋