新晉電視大亨、「殼王」陳國強電影夢未碎。陳國強旗下保華建業（577）舊年8月搞咗單神奇刁，夥拍《潛行凶間》製作公司傳奇娛樂同內地嘅華誼兄弟，合組傳奇東方，保華原本諗住用呢個古仔配股集資，然後注資17億元落間合資公司，但到咗年尾，單刁因為配股唔成而告吹。
繼續夥拍傳奇娛樂
聽聞陳國強對單刁仍然好有興趣，諗緊繼續參與，但形式有變，未必用上市公司做，可能改用私人名義。
背後搞手家搵緊幾個大型基金籌錢，希望喺呢個月內埋到班，而傳奇娛樂同陳國強依然係膽（上次保華佔50%，傳奇娛樂同華誼分別持股40.1%及9.9%），另外搵緊投資者，華誼兄弟就十之八九會出局。
點解華誼兄弟會被飛出局呢？線人同華華講，好幾個基金都質疑，點解華誼兄弟咩嘢都唔使出，就攞到傳奇東方9.9%股權，而且內地咁多電影發行商，唔使一定要搵華誼合作，淨係同華誼合作反而限制咗間合資公司嘅發展，講講吓，單刁就做唔成囉。因此，背後搞手最近都無再搵華誼傾，集中火力搵識得電影行業發展嘅基金籌錢先。
李華華
mailto:[email protected]