四年一度的奧運就快殺埋身，上屆在中國北京舉行，比賽時間超正，但今屆的主辦城市是英國的倫敦，少不免要捱更抵夜。至於邊個項目最好睇，就見仁見智，若然問我，一定會揀游泳。點解？因為快靚正。
游泳都有好花時間的項目，例如是1,500米自由泳，要在個泳池來來回回游成15分鐘，真係睇到人打瞌睡。幸好，大部份項目都是短途賽，分零兩分鐘就會知賽果，完全適合生活節奏急促的香港人。而個人認為50米自由泳就最激烈，由跳落水到掂池那一刻，廿秒左右，若然在比賽途中眨一眨眼，就會錯過部份精采的情節。
經常有爆冷賽果
游水另一個好睇之處，就是不會由一個國家獨大，並不時有爆冷賽果。雖然，美國仍然是游泳強國，不過其他國家都有機會分一杯羮，其中在08京奧冒出頭來的巴西泳手施奴菲荷，便是現時男子50米及100米自由泳世界紀錄保持者。原來巴西人除了踢波叻，亦都精於游水。
另外，不知何解，游泳這項目特別多型男，佼佼者當然是俄羅斯名宿波波夫、澳洲名將科比（有傳他是同性戀者），以及在88年漢城（現譯首爾）奧運挑戰7金失敗的美國泳手拜安迪。
我就對雙手特別長的西德泳手哥斯，印象最深刻，事關他在游蝶泳時猶如一頭信天翁，所以亦得到這個外號。至於女泳手，我對東德的奧圖最有印象，因為驟眼看，她實在太似一個男人了。
文：青蛙仔