今季首度升上英超嘅「天鵝」史雲斯，之前享有「英冠巴塞」稱號，球隊今季表現亦對辦。上個月史雲斯就喺英超贏過維拉同阿仙奴，亦賽和車路士，結果主帥羅渣士（左圖）當選1月份英超最佳領隊，熱刺嘅加里夫巴利就獲選最佳球員。另外，史雲斯嘅荷蘭中場保迪（右圖），喺日前對阿仙奴預備組嗰陣重創，羅渣士擔心呢位29歲中場有機會提早收山。