吳卓羲（Ron）、苗僑偉（三哥）、黃智雯、梁烈唯同賈曉晨（JJ），噚日喺大埔林村許願廣場宣傳無綫劇集《缺宅男女》，鍾嘉欣因病缺席。
眾演員齊齊將寫咗願望嘅紙掟上許願樹，為劇集祈福，吸引大批市民圍觀，有唔少市民仲大嗌黃智雯做「關二嫂」，相當受歡迎。Ron話會求身體健康，姻緣就隨緣，佢話自己姻緣一向唔係好多，不過今年有買桃花旺人緣。黃智雯就話一定會求姻緣同希望工作順利，佢又話唔怕「關二嫂」角色俾現場市民鬧。
三哥滿意收視
三哥之前炮轟《缺》劇唔應該安排喺新春檔播映，噚日佢話：「講咗就算，不過上星期最高有33點（收視）都好滿意，我預咗觀眾會鍾意，只係預計唔到農曆年播，發夢都諗唔到。」Ron同黃智雯都唔擔心檔期影響收視。
另外，Ron同鍾嘉欣喺觀塘碼頭場分手嗰場，俾網友話抄林峯同楊怡嘅《談情說案》，Ron話其實視乎演員點演。講到鍾嘉欣同謝天華條感情線被彈演繹得好冇腦，Ron力撐話：「之後啲戲會順啲。」