本來想跑完了馬拉松才記下感受，不過看了同文姚崢嶸的「馬拉松你都可以」，當然還有蔡東豪周末前的「Beginner'sLuck」，想想也就湊興先寫為快。論毅行資歷同成績當然難望東豪項背，我參加咗5次都未及佢嘅一半（佢揚言掛靴，若然守得住寡，我都應該有望追及），仲要話哂佢都係位列「超級毅行者」（吾仍需努力），惟一拍得住嘅就係剪帶次數！而參賽馬拉松我就總算多過佢，雖然上年佢嘅處男跑都仲係快過我2分鐘，不過剛好趕在終點合照！
氣氛非熱烈 為自己加油
按照東豪前文，初次參賽者在放開期望、心理包袱和壓力，懷着清純的心或者所謂平常心的情況下，可能會創造意想不到的好成績，聽落受用。但係計我話佢縱非異於常人，但個人條件亦實在有其獨特性，一般人未必可以參考。試問有幾多人係行過成10次毅行者而又係STeam，跟住先轉去跑馬拉松？所以我諗佢心中都係有數認為可以4小時游刃完成，若然唔係點能夠到咗西隧仲係收放自如？難為我嗰年處男全馬幾乎係爬入西隧！
之但係點都要幫自己打打底，心理調節紓緩一下，即咪又係財爺預算案嗰款「走盞位」。至於大部份膽粗粗，心口掛勇然後報名參加全馬賽程嗰啲，包括幾年前嘅我，其實絕大多數都已會不計時間，因自顧不暇，但求唔使上車，順利完成賽事就幾乎要大宴親朋。所以殊難處之泰然，反而緊張兮兮，第一次跑全馬嗰晚直頭失眠！因為我哋會非常擔心體能應唔應付到咁大嘅負荷，又聽埋聽埋咩會跑到咁上下會撞牆，你話好人好姐無端點解會撞牆？撞鬼就真！總之未開步心態上已處下風，加上香港又唔係東京大阪，打氣氣氛連廈門都比不上，惟有學油公司口號咁：「不斷為自己加油」，催谷同強迫給力。至於捱唔捱到返終點？就真係各安天命。
同精B羣揪 輸咗請食飯
而今次馬拉松我將會糾眾和東豪的精B另行友賽，即係「私片」，以四個人為一隊的合計全馬時間較勁，「單挑」變成「羣揪」。而慢咗嗰隊真係要擺番幾圍宴請，講真係有壓力，唔知係呢啲「帕（壓力量度單位）作用」下，東豪在跑在文又會有咩發揮？最後我都祝願所有第一次全馬跑手順利完成賽事，「馬」到功成！至於我哋同精B最終成績，容後再談。
盧先亞