謀殺手機無限上網，似乎已成定局。幾間流動電訊公司近排好有默契，明示暗示2月13日，即電訊管理局（OFTA）實施公平使用條款後，無限上網的死期亦近。數碼通（315）仲順水推舟喺「213」正式殺死無限上網，仲以變相加價贈興。
成件事的源頭，要追溯到前年初，有傳媒揭發CSL突然修訂政策，將部份無限上網的流動用戶限速，若然用家用量過多，速度有可能被大幅減到龜速16kbps，用家喺「滴滴仔」的情況下，連CheckEmail都有難度。後來OFTA裁定CSL誤導，罰款13萬元。類似情況原來好普遍，當局於是研究訂立公平使用條款，防止電訊商慣性喺無限上網設限，誤導消費者。
數碼通搶閘 變相加價
OFTA喺去年11月宣佈，由今年213開始，實施公平使用條款。電訊商日後的無限上網計劃條款，要用明顯字體講清講楚咩情況先會限速，而網絡商最低限度畀用家128kbps速度，保障用家仍可以使用合理速度。新條款原意係保護消費者，點知就俾人利用。
就係OFTA宣佈條款前夕，有報章就率先引述消息人士話，網絡商取消無限上網，事在必行。呢位消息人士，話唔少人濫用無限上網的數據服務，令成本大增，業界都有共識要逐步淡出無限上網服務，但佢亦煞有介事澄清，「（電訊商）未就停用無限任用數據計劃進行商討，亦無達成任何協議」。
電訊商要殺死無限上網。其中一個邏輯係普通用戶不斷補貼高用量用戶。數碼通行政總裁黎大鈞去年仲口口聲聲話，若果取消無限上網，普通用戶或者有減價空間。點知數碼通即將推出嘅新月費仲變相加價，黎大鈞嘅講法係，取消無限上網後，普通用戶加價壓力會少啲。當正傳媒集體失憶。
電訊商另一個講法係數據用量增加，令到網絡負荷加重。但係數碼通及和電香港（215）、CSL，喺OFTA公佈新政之前，都不約而同強調有足夠頻譜應付需求，數碼通及和電香港去年先同OFTA成功競投兩條新頻譜擴容，和電表明會重整2G頻譜，應付需求。即使競投失敗的CSL亦喺去年的新聞稿，自稱比其他網絡商有更多頻譜。
PCCW未擬取消 3及CSL研究
數碼通以往提供398元無限上網月費，新計劃之下，同一價錢，每月只有2Gb的數據用量。黎大鈞話，旗下八成半用戶每月用量都低過2Gb，顯示每月2Gb用量，足夠大部分人的需求。但實情係隨着新款智能手機出現，即使係普通用戶，日後數據用量會不斷增加，如iPhone4S的Siri、雲端系統消耗相當的數據量。類似三星的GalaxyNote手機，屏幕咁大，用高清睇片睇相的數據需求更大。2Gb分明係滯後的參考水平。
呢幾年智能手機興起，網路商初時用無限上網作招徠，帶挈佢哋收入超快增長，豬籠入水。佢哋自然有動機集體殺死無限上網，將收入最大化。目前，四大3G電訊商當中，除咗數碼通已經表態外，和電香港旗下「3」同CSL態度仲係相當曖昧，只話會研究，唔肯講明幾時正式取消無限上網。只有香港電訊（6823）旗下PCCWMobile話未考慮取消。即管睇下佢哋會否咁巧合一齊係「213」取消無限上網。
電訊行業係寡頭壟斷的典型例子，由於競爭者有限，合謀的誘因相當大，特別容易出現公司集體抬高價格。電訊業係香港首個有競爭法規管的行業，就係為防止合謀定價出現。合謀定價不一定要宣之於口，有一種係心照式的合謀定價（TacitCollusion），在共同利益驅使下，只需要一些訊號，便很易形成默契，期間不一定要有溝通或枱底協議，這種既競爭又合作的態度，在博奕理論的文獻中時有記載。
頻譜是重要的公共資源，電訊管理局有責任令市民可以合理價格用頻譜。
啞子吃黃連
上個月有單配股，接貨的投資者如果冇預先沽空，就真係有苦自已知。
六福（590）上個月喺農曆年長假前最後一個可以配股的日子，即係1月19日星期四配股抽水，每股29.25元比市價折讓近一成，集資淨額13.4億元。唔夠兩個星期，六福就公佈今年農曆新年期間的銷售額遠遜預期，按年增長只得4%，搞到本來跟配股價比較已經潛水的股價，進一步下跌，上周五得番27.3元。
六福在2月1日用向媒體發出新聞稿的方式，而非公告，宣佈1月14日至30日期間（即年廿一至正月初八）與去年農曆新年同期（即2011年1月24日至2月9日）相比，香港及澳門分店同店銷售按年增長僅得4%，遠遜之前預測的20%。
行政總裁黃偉常解釋，因為農曆年期間，天氣特別寒冷及經常落雨，影響遊客來港及外出購物消費意欲，再加上聖誕節、農曆新年及西方情人節較為接近所致。
六福配股後 生意即走樣
六福19號配股，17天統計期中只係過咗6日，年假又未正式開始，好難話六福管理層配股當日已知今個農曆年高增長不再（去年暴增逾七成）。但快快手手在過年前抽水，從公司同埋包銷商高盛的角度出發，Timing當然係好好，因為之後就算六福自己唔講，莎莎（178）、周生生（116）等自由行概念股都有講，同樣顯示增速放緩，遜於預期。
越來越多人開始估，自由行為香港零售業帶來的高速增長，已經開始減速，好難再見到每年數十個巴仙的增長率。早前樓上的丘亦生話，太古（019）、長實（001）和信置（083）過去幾個月先後出售商場資產，可能反映商場業主都覺得香港零售銷售增長見頂。其實睇埋彤叔間家族旗艦公司周大福（1929），都唔計較個市唔係咁旺IPO，都要爭取去年底搞掂上市，就知道一眾大孖沙，早已心中有數。