上周有單地產新聞，地產經紀勁蝕百萬沽出大圍名城二期盛薈，屬典型「喺度食又喺度痾」出事個案。查實經紀落場玩好平常，但事先應知道樓盤有冇水位先好出擊，牽涉到800萬銀碼，落注前更要慎重考慮。該經紀好彩避得過額外印花稅（SSD）影響，但就避唔到長實劈價賣樓，要怪只怪他錯信李嘉誠。
問過地產版同事，近幾年買超人樓，認真濕滯，該經紀喪蝕只是冰山一角個案。由2008年至2011年3年間，長實推出3個大型新盤，分別為將軍澳日出康城、大圍名城一至三期，以及何文田半山壹號一、二期，大部份開價一期低過一期，即買即坐艇。
以名城為例，2010年3月首推即供呎價貼近8900蚊，8個月後再推第二期盛薈，撞正SSD出招，即供呎價落到8326元，較首期平6%，過多1年推三期盛世，即供呎價再跌至8109元，較首期平近9%。今次經紀買盛薈輸百粒未算最慘，早前已有業主連同SSD勁蝕200萬元。
首都四年僅升3%
至於毗鄰為屋村、包裝成豪宅的半山壹號，一期首批開售呎價高達1.53萬，較現時市場1.01萬平均呎價，足足跌了34%。或者你會話，領峯、領都同首都對比市價，家都有賺3%至8%。但如果你比較同年其他非長實新盤，你會發覺人買樓、你買樓，點解人哋賺三、四成，你就賺3、4%，賣咗層樓，俾完律師、釐印費，到頭來分分鐘得個桔。
股榮揀選08年至2010年非超人新盤作比較，大家不妨作為參考（見表）。08年荃灣御凱首批呎售6015元，與現時平均呎價9250元比較，3年半升值53%，至於08年2月開售的首都，4年間僅較現時市價高3%。再睇09年，銀湖．天峰以每呎4648元即供價開售，現時市價每呎6575元，升幅41%，同年領都、領峯以呎價4700元開售，相對現價，高水不足一成。
遇上經濟逆周期，樓價跌無可厚非，惟有逆來順受。但在過去3年樓市狂熱期間，買超人樓居然未有升值效果，部份更要淪為樓蟹。反觀其他發展商新盤水漲船高，如果我係超人新盤業主，我會眼紅，感覺絕不好受。
過去數年記者會，李嘉誠總以「量力而為」回應現時是否買樓合適時機。做完統計，我開始明白箇中意思，「輸唔起就唔好買啦！」
股榮