恒指上周五表現悶蛋，但個股就非常神勇，廿大升幅榜全部進賬逾一成，當中又以第8位嘅神州資源（223）最堪憧憬。
神州資源上周五中午出通告，話股東之一洪誠等人，已中止向公司提出法律訴訟，下晝股價立即發力，全日勁升19%，收報0.31元。洪誠等人於去年2月底，向公司及3位執行董事提出申索，拖累股價由高位0.59元跌至0.175元，累積跌幅達70%；如今事件告一段落，上周五嗰一棍相信只係熱身，初步目標係去年中密集區0.40元，潛在升幅29%！
神州資源前身為展覽股建發，已變身資源股，業務範圍包括煤礦、煤層氣及頁岩氣等，食正新舊能源概念，主席耿瑩擁有豐富礦業經驗，曾入北京地質隊，更加係中共元老耿飆個女，人脈關係毋庸置疑，對公司未來擴展版圖十分有利；雖然中期業績冇錢賺，但家不明朗因素消除咗，項目上馬速度勢加快，肯定可以提高盈利能力。
唐牛