在樂壇默默耕耘了27年、自嘲死老鬼的李克勤，早年成家立室，太太盧淑儀為他生了兩個囝囝，龍年剛到，克勤工作上已寫滿大計，將推出唱片及舉行音樂會。始終兒子已上學，要多點時間照料，他不會追女兒，更笑說：「（兒子）媾人哋嘅女就得喇！」皆因他希望把所有時間奉獻給兒子，做廿四孝爸爸。 撰文：王連連
若果問李克勤刻下最珍重的東西，曼聯？無綫？最受歡迎男歌星獎？從他在訪問中提起一對愛兒時，笑容便變得特別燦爛，興奮地聊個不停，又樂意將手機內兒子的照片讓人看，便可知道答案。克勤在樂壇唱足廿幾年，名成利就，又擁有美好家庭，與港姐冠軍盧淑儀結婚，又是兩個囝囝的爸爸，羨煞不少人。現在克勤有仔萬事足，為了多點與兒子相處，克勤和陳慧琳一樣，出埠工作時會盡快返港，訪問當天他要趕往內地開個唱，他表示做完演唱會便會匆匆回港。新年的時候，又會跟兒子看賀歲波，他說：「因為大仔想睇。」盡顯廿四孝一面。
「唔使追個女」
問到克勤會否為兩個兒子添一個妹妹，他即時擰頭說：「我？唔使喇！唔使追個女，再生多個，兼職要做多幾份。養小朋友負擔好重，而且要好多時間陪佢哋。我冇咁多時間，如果再有第三個，真係分配唔到。」他盡量把握時間陪愛兒玩耍和上學，還笑言將來兒子娶老婆，便會有女兒，他笑謂：「媾人哋嘅女就得喇！」
幸福滿載，今時今日應該無特別所求吧，克勤想了想，笑着說：「梗係想要錢啦！」此言並不代表他拜金，貴為天王級歌手，想要的東西很簡單，他說：「名同利，其實睇真啲，只係一個比較。每個人感覺都唔同，當擁有好多嘅時候，又會覺得唔及人多。其實家最緊要係自己同屋企人，錢係最大動力，可以喺工作試好多嘢，搵到滿足感。」
20多年的音樂路，克勤每次出碟和開演唱會都花盡心思，有喜亦有悲，克勤遇過不少低潮，其中他舉行第二次紅館個唱，入座率欠佳。回想過去，克勤道：「當然呢廿幾年有高有低，家係咪自己最滿意，又唔敢講，但憑以往經驗，冇以前就冇今日。第一次演唱會賣得、到第二個演唱會唔賣得，之後再開第三個賣得，每次順逆境都難忘。我唔介意遇過低潮，喺同一行業工作去到20幾年真係唔容易，而且仲出到自己鍾意嘅唱片，喺無綫拍劇時候好開心，而且我咁鍾意足球，仲有機會做世界盃主持，如果唔係藝人，我邊有機會做呢啲嘢。」
自嘲死老鬼
常說時下歌手質素下降，歌手被批評走音、頒獎禮被指分豬肉，克勤仍屹立娛樂圈，仍跟着時代巨輪游走，他強調不會心灰意冷：「家坐喺頒獎禮，好似容祖兒，佢已經算係資深歌手，但佢年資未夠我一半。坐我身邊嘅，都好似小朋友，但我唔會咁諗，反而佢哋可能覺得我好似死老鬼，我拋開晒呢啲唔諗喇。」
化妝：Angle 髮型：Adolph
服裝提供：I.T.、Native
場地提供：ConradHotel
看守廣東歌地盤
當很多歌手趕着出國語歌和國語專輯，北上霸佔市場一席位，加上早前廣東省政府為推廣普通話而推出新例打壓廣東話，令廣東歌前景雪上加霜，幸有歌手繼續堅持，如陳奕迅便多次力撐廣東歌。
「係我哋嘅根」
李克勤也堅守廣東歌市場，他說：「家好多人都返內地出碟唱歌，我都會出國語碟，但廣東歌市場都好鍾意，因為佢係我哋嘅根源。其實廣東歌未必唔及國語歌，總係有種使命感，點都會出廣東碟，每次出碟都好認真。」
問到市道低迷，今時今日的唱片銷量已不能跟以往相提並論，克勤享受過以往的風光，可曾感到意興闌珊？他說：「曾經有個時候覺得做廣東碟都賣唔到，唔普及做嚟做乜，但呢個真係我哋嘅根，實際家國語碟賣幾多，我覺得分別唔係太大，只係錯覺。」
