喺電影《龍紋身的女孩》（TheGirlwiththeDragonTattoo）入面，鐵金剛丹尼爾基格跟來自瑞典嘅龍紋身女孩朗妮瑪娜有一段激情；原來，目前正在養傷嘅曼聯門將連迪加特，亦同一名來自瑞典嘅女模碧姬莉（MisseBeqiri）打得火熱，而碧姬莉替雜誌及廣告影相時，毫不錫身，又食煙又三點盡露嘅行徑，真係媲美龍紋身女孩。
女友粒墨似仙蒂歌羅馥
丹麥龍門連迪加特喺今季轉投曼聯之前，啱啱同佢相戀6年嘅女友分咗手，理由係女友頂唔順佢太專注足球；不過，話咁快名27歲嘅門將已經搭上咗瑞典籍阿爾巴尼亞裔模特兒碧姬莉。25歲嘅碧姬莉身高1米74，三圍係34B-24-33.5，雖然唔算係波霸身材，但勝在夠勻稱，而且每每影相時都毫不錫身，露點絕對係閒事，所以，好多攝影師同廣告商都好鍾意用佢，加上佢嘅左邊嘴角對上有一粒墨，同荷李活影星伊娃曼德絲（EvaMendes）同埋前超模仙蒂歌羅馥（CindyCrawford）好相似，好鬼銷魂，所以亦有「北歐仙蒂歌羅馥」嘅綽號。面對咁嘅尤物，連迪加特自然成為佢嘅俘虜。
受傷益咗賓艾莫斯擔正
因此，雖然連迪加特剛剛因足踝受傷要唞4星期，但有碧姬莉陪伴，相信佢唔會覺得悶。
不過，由於連迪加特受傷加上迪基亞又病倒兼已經唔受曼聯重用，造就咗紅魔嘅3號門將賓艾莫斯，極可能喺下周日曼聯到訪車路士嘅聯賽大戰中擔正。而年僅21歲嘅賓艾莫斯亦話等咗呢個機會好耐，啱啱喺周二勝史篤城2:0嘅聯賽喺英超首次擔正的賓艾莫斯話：「我等咗呢個機會已經好耐，所以，我一定會好好珍惜同埋把握。其實，我一直已經準備就緒，我會喺練習時盡量表現自己，令領隊留下好印象，並向球隊其餘嘅龍門施壓。」