現年28歲嘅李彩華（Rain）家長駐內地拍劇搵真銀，雖然成日中港兩邊走，但Rain同金融才俊男友潘啟翀（Derek）嘅感情就好穩定，之前佢哋仲拍拖去韓國預支蜜月，有傳佢哋會喺今個龍年拉埋天窗，前日Rain仲同媽咪着紅色母女裝去銅鑼灣行首飾店，似乎有意辦嫁妝做龍年新娘。
貼身用品冧男友
前日Rain全程都係睇鑽飾，佢仲先後試戴咗多條款式特別嘅頸鏈，當中仲有條鑲咗巨鑽㖭，而Rain媽亦有畀意見，不過Rain最後都揀唔啱。馮仁昭之後打電話問Rain係咪辦嫁妝，佢笑住話：「唔係，我未嫁住，我13號做Wyman（黃偉文）演唱會嘉賓，佢準備咗靚衫畀我，我想買啲飾物襯吓，但未睇啱。」
Rain又話唔急做龍年新娘，嚟緊情人節，佢話未計劃去邊度慶祝，但會買定情人節禮物送畀男友，Rain仲話一定會揀啲貼身用品，因為咁先夠實際，似乎佢未做潘太已經識精打細算。