新年到馬會吃飯，例牌碰到不少熟人，有三四位仲係選委㖭，碰到選委唔講馬就講選舉㗎啦，生性八卦嘅左丁山逐位問：「提名邊一位先生？」選委Ａ講得坦白：「未簽呀，二月十四日前後啦，都要睇吓民意調查嘅，相差太遠就唔好啦！」似乎幾民主噃，於是問佢：「假如，假如啫，大量市民喜歡民主，支持何俊仁，民意調查中何俊仁突然領先晒，你會唔會提名何俊仁？」選委Ａ苦笑：「唔好講笑啦，我點會提名何俊仁，佢民望點高都冇用，事實係佢嘅民望最低，我只係講CY與亨利啫，聽講佢兩位都係中央可以接受嘅，兩揀一之嘛！」何俊仁的確民望甚低，但如果泛民一早聯合行動，提名陳方安生、余若薇嘅話，呢兩位女士嘅民望肯定高出何俊仁好多，超逾五成都唔奇，咁嘅話，CY就唔會開口埋口講民望咯，如果中央認可民望高就選誰嘅話，何不索性搞真正直選？唔怪得一位老愛國人士對左丁山講：「CY講得太多民望論，似乎以民意挾中央，令中央尷尬，佢醒目嘅話就應該講少啲！」
見到選委Ｂ又問同一問題，選委Ｂ即刻講：「已應承簽俾亨利，有好多朋友打電話嚟叫我挺唐，冇人叫我挺梁，正是物以類聚。識做啦。」選委Ｃ又點？佢話：「有好大壓力，幾位行家說我簽俾CY，成家人要我簽俾亨利，卒之人在外國嘅細佬打電話返嚟警告我唔好挺梁，否則反面，驚動到阿媽㖭！」嘩，咁大件事？因住家庭不和噃，選委Ｃ話：「唔會，我費事煩，答應咗挺唐，喺屋企立即耳根清靜。」
做選委有選委嘅煩惱，賓架Ｂ係上屆選委，今屆自動退出唔參選，飲茶時佢話：「2007年即使係曾蔭權對梁家傑，曾生贏梗，我還是不停收到電話，今年唔做選委一身都鬆晒，唔知幾好，啲選委老友遇到CY與亨利爭，一定收電話聽到耳仔震。」小圈子選舉，一定係咁，記得當年麥理覺競選總商會立法局議員，佢話每一張選票都係佢親自上門拜訪選民，握手握番嚟嘅，靠秘書或助手打電話拉票，係唔夠誠意㗎喎！
【後記：練乙錚批「民望決定論」，十分深刻，同唔同意都睇吓信報二月一日A13】