何超瓊（Pansy）和俞琤被踢爆同遊歐洲後，兩人前晚和昨日分道揚鑣回港，春風滿面的Pansy昨晨回港，除有關俞琤外，其他有問必答，更不忘出口寸何超雲，暗笑她不停在微博晒甜蜜。而俞琤昨現身商台團拜時，依然全程封嘴，但卻慘被DJ狂玩。
賭王何鴻燊二房千金何超瓊近年和商台揸弗人俞琤過從甚密，傳出斷背情，日前Pansy和俞琤被本報率先踢爆前後腳現身機場飛往巴黎度歲，兩人在當地享受二人世界亦被傳媒撞破，結果兩人轉戰到倫敦繼續行程，難得未有影響愉快心情。
為免同機回港，俞琤前晚率先抵港，而Pansy則昨早七時才回來，她拖着行李步出閘口，由司機到場接走，現場見她全程保持微笑，心情靚絕。問到是否玩得很開心？Pansy表示：「好短啫，只係去幾日休息吓。」
至於到巴黎和倫敦那裏遊覽，她笑說：「其實我冇乜值得講嘅價值，我唔興放上微博，真係要學吓。」此話擺明寸超雲，皆因她和男友陳山聰早前歐遊時，不停在微博貼相上兩人親密合照大晒甜蜜幸福。至於被拍到跟俞琤蹺手，Pansy透露朋友已轉告她。
派利是甜到漏
有記者問俞琤是否她的男朋友？Pansy笑着淡定說：「你係咪實習㗎？」再追問情人節如何度過以及爹哋有否追問戀情，Pansy皆笑而不答。至於回港後會否向爹哋拜年？Pansy透露：「其實出門前已同佢拜咗年，祝佢身體健康，屋企一團和氣，龍年多喜慶事，呢一年大家都會好開心。」
另邊廂，俞琤昨早出席商台團拜，現場見她右手無名指有戒指，全程同樣笑容滿面，其中DJ潘小濤祝賀俞琤時搞笑說：「祝你心想事成，旅遊開心。」即令全場譁然，林海峰聞言抵死說：「你講得好短，但好精，炒佢啦！」接着俞琤派利是，記者上前追問，她只說：「我咁多年都冇做訪問，唔回應。」提到記者在Pansy面前形容俞琤為男朋友而露出甜笑，俞琤只是派利是，再追問開不開心、手上是否定情戒指等，她充耳不聞由公關護送返回樓上辦公室。
採訪：盧妹、李珮洳
攝影：仇志德
