【本報訊】去年本港零售市場在「北水」支撐下一片暢旺，但剛過去的農曆新年不少商家銷售卻差過預期，珠寶商六福（590）日前更公佈同店增長由以往的20%至30%，跌至得4%。行政總裁黃偉常坦言少咗自由行生意，要重拾去年幾成的增長是無可能；零售管理協會主席麥瑞琼更對今年珠寶業前景「唔樂觀」：「你見銅鑼灣開到一街都係，我覺得已經有少少反效果！」
麥瑞琼表示，農曆新年的銷售情況的確較想像中差，尤其是自由行旅客數字按年竟然「零增長」，情況罕見：「喺大節日珠寶嘅銷售都竟然麻麻地，的確係有啲危機。珠寶一向係自由行消費最大嘅指標，有可能係自由行效應消退嘅先兆。」
不過由自由行一手吹起的「零售泡沫」，今年到底會否「爆破」，麥瑞琼指要睇埋2月零售表現先見真章：「如果到2月中仲有好多減價出現，即係有好多舊貨都賣唔出，咁就要小心。」她相信今年零售環境不容易，但仍希望全年增長可達15%，已經「好心足」。
六福：銷售已下滑
對於新年銷售「滑鐵盧」，黃偉常解釋主要是天氣嚴寒加上天雨影響：「落雨啲人都唔願出街，內地客亦少咗，不過舊年基數太高喇，先覺得個增長低，但其實表現都唔係太差㗎！」他承認，4%的同店銷售升幅主要是受金價上漲帶動，如以銷量計其實是下滑；但他強調這是短期情況，有信心銷售可重上雙位數增長，「但要好似舊年咁，升幾成就無可能㗎喇，10%以上應該都無問題。」
謝瑞麟（417）首席營運總監陳立業亦透露，公司新年銷售亦只有單位數升幅，他認為主要因為去年農曆新年與情人節相近，生意特別好，才令今年表現顯得有些遜色。
「不過生意係比上半年度（去年3至8月）慢咗，我哋要睇埋情人節嘅表現，先預測到今年情況。」陳立業說。
昨日政府公佈去年12月份零售數據，銷售額按年升23.4%，符合預期，銷量則增17.1%。以全年計，去年零售額增長高達24.8%，連續第二年創歷史新高。