宅錄：甜到溶　朱古力煮飯仔

唔理你係單身玩暗戀定拍緊拖，二月十四送朱古力畀心上人可以話係傳統，而現成買返來嘅朱古力，又點及自己親手整更能表達愛意呢？正所謂工欲善其事，必先利其器，想整專屬自己特別又好味的朱古力，先選擇心水工具啦！

記者：陳家蕊
攝影：譚盈傑
Model：Martin&Paris@PureModels
場地提供：甜餅屋

當你溶了朱古力，這個時候就可倒入朱古力模入面定型啦！其實我們平時買的朱古力形狀唔係方形就係圓形，好悶囉！其實市面上的朱古力模款式多不勝數，昆蟲款、動物款，植物款好多千奇百趣款都有，連一系列的卡通人物都推出了朱古力模！
唔講形狀，講朱古力模的質地有分硬膠、薄膠同矽膠三種，根據ILoveCake的店員指矽膠做的朱古力模好處是容易倒出已凝固的朱古力，但缺點就係做唔出光面朱古力，更可能會有小氣泡的情況，相反硬膠同薄膠朱古力模雖然好像較難取出朱古力，但是其實只要把朱古力模左右輕拍桌面數次，朱古力就會輕易跌出，千其唔好夾硬呀！

■同情人一齊整朱古力，整的朱古力一定更甜。

原來煮朱古力溫度都好重要，甜餅屋導師Sally就教水溫大概攝氏四十度至四十五度就係最佳溶朱古力的水溫，過熱朱古力再凝固可能會不平滑，有了測溫槍就一目了然，知道溫度啦！

整朱古力的第一步，是到整蛋糕的專門店或超級市場買下心水味道的朱古力，然後將它煮溶。甜餅屋的負責人教路，一般來說溶朱古力只需要一個煮公仔麪大小的小鍋，因為朱古力不可以直接用火燒，所以要隔水加熱，把朱古力放在小鍋，再把小鍋放在沸水中，透過熱力把它溶化。太複雜？放心，其實一早有人關注到連煮公仔麪都覺得有難度的你，推出專門溶化朱古力的機器。小記就喺專賣日本新產品的JCShop發現咗一部超可愛的D.I.Y.朱古力機，入面有齊晒整朱古力嘅工具，只須啟動開關，預設溫度就會將容器內的固體朱古力慢慢溶化，約三至五分鐘後取出倒入模具中即可！勁方便！真係易過煮公仔麪！點解話佢超可愛？睇佢心心紅色的外形，再配上用心形盤子裝住的小工具攪伴棒，全部細細件，相信用的時候一定會憶起細個玩煮飯仔的回憶，感覺好玩，不嬲都話廚師的心情會影響到食物的質素，所以相信你同呢部機煮朱古力開心甜蜜的感覺，食嘅人都能完完全全感受到！