【本報訊】失明婦不堪任職的士司機的前丈夫拈花惹草，三年前以滾粥淋其下體，因傷人飽受兩年牢獄之苦，夫妻情不但因此而斷，前夫又指其性器官受重創，留有疤痕及經常痕癢，影響工作及與現任妻子行房，在她出獄後要求她賠償80萬元。
原告梁耀元（58歲）有三段婚姻，兩次也是有第三者而鬧離婚，包括被告即第二任妻子繆翠芬（60歲）也是他的外遇，最後被繆發現再有第三者而被淋滾粥。但他昨在庭外跟記者堅稱自己對繆很好，細說二人的的士情緣，還理直氣壯講及自己多女人，但「識得返屋企」。
兩人在77年相識，當時他任職的士司機，繆則在的士台工作。他指繆當時視力已有問題，聲稱因「由憐生愛」，不惜拋妻棄子追求繆，89年共賦同居。婚後為證明對繆一心一意，他聲稱將所有資產歸繆名下，二人風光時擁有三架的士及物業，又開設的士電召公司，更在肇慶經營偈油生意，資產高達300萬元。
曾被花膠雞湯淋傷
但2000年繆學習算命，算出他會有外遇，開始對他不信任。他更理直氣壯承認因不時交際應酬，在外確曾拈花惹草，但屬於「合則來不合則去」的關係，從未試過不回家過夜。他自爆與現任印尼籍妻子結識，全因繆08年向他說「你唔返工我會損失好多」，他「被迫」假扮上班，實際前往唱K，與現任妻子撻着。
梁作供時指，08年10月11日，他遭繆以滾粥淋下體後，需住院三星期，之後兩個月每天需往醫院洗傷口，至今留有死皮，每次行房均痛楚，亦影響他揸的士的收入。但繆質疑梁聲稱行房疼痛影響性生活並非事實，因她在94年亦曾不慎用花膠雞湯淋傷梁下體，當時梁的下體已留有疤痕，但無影響性能力。繆又指梁的多份醫生報告從沒指他出院後已開工。案件編號：DCPI118/10
滾粥淋夫案對白
妻：比起今次，94年啲湯淋下體傷得更嚴重，煲花膠雞湯慶祝端午節，啲花膠湯肥到不得了，啲花膠黏住啲肉，份量多過啲粥。
夫：得湯，冇花膠，但今次啲粥黐住皮膚，熱力一路滲入去，好痛。
妻：你食咗都唔認賬呀，點會冇花膠？
夫：兜湯都打爛咗淋晒落身，點會食到花膠？
妻：當時住院兩周，出院後冇影響性能力，仲刺激咗，仲好密添。
夫：嗰次淋嚫即刻沖凍水，所以冇死皮，同今次性能力上有分別。
妻：又話次次造愛都痛，但09年9月同人生咗個仔，點解咁痛都可以咁快活？忍痛射精呀你？
夫：痛同射精係兩樣嘢。
妻：08年11月出院，洗傷口洗咗兩個月，個仔09年9月就出世，咁痛苦仲咁happy?
夫：洗完傷口同太太有性行為，係想試下仲有冇呢個能力，所以有咗呢個BB。