前排有產品被驗出有致癌物質嘅蒙牛乳業（2319），被強國傳媒同網民片咗一輪，近日終於靜返啲。不過你以為無事咋，佢哋股東就唔係咁諗，事關過咗成個月，恒指都升番成千點啦，蒙牛股價都未返到去出事前26蚊，仲喺20蚊左右上上落落。之前美林仲估，蒙牛08年之後出過3次事，每次1個月之內股價都可以返家鄉，似乎今云無咁好彩喇！
蒙牛之前應承咗華華，1月會去內蒙古呼和浩特探吓啲牛牛，不過因為當時毒奶事件發生無幾耐，管理層太忙，所以甩底。原本個trip延遲咗去2月，但噚日又再失約去唔成。公關都係嗰句，話高層好忙，唔係避風頭唔見人喎！華華希望蒙牛所言非虛，因為避得一時唔避得一世，好快就到3月業績，你估唔使同股東交代咩？