英皇一班同門容祖兒（Joey）、古巨基、Twins、陳偉霆同吳浩康等，前晚喺跑馬地駿景酒店出席公司新春團拜，但幫英皇賺錢最多嘅謝霆鋒就缺席，據知嗰晚係好友葉佩雯生日，霆鋒下廚炮製大餐同壽星女慶祝兼畀眾好友享用。
戒煙兩個月
霆鋒最近迷上烹飪，有時間就炮製大餐畀家人同朋友食，前晚就趁葉佩雯生日玩煮飯仔，在座嘅徐濠縈即時上載啲相到微博，仲寫住：「ChefNicNic又大顯身手！全晚由頭盤、主菜到甜品，都是chef霆鋒一手包辦！」至於前晚團拜，Joey、基仔同Twins玩鬥撈麪，寓意龍年撈得風生水起，飯後又拉隊唱K。
此外，劉浩龍噚日到商台宣傳新歌《髒話阿七》，強調歌詞中冇粗口：「首歌係講人遇到挫折時，講完句粗口又嚟過，我自己都係咁。」又透露食過謝霆鋒下廚嘅美食：「佢煮嘢好好食，同埋嗰晚同千王之王四哥賭錢，我勸到霆鋒戒煙兩個月。」