美國共和黨初選，在每個州都有候選人參加辯論大會，初期（艾奧華州）講理念、政策，但去到南卡羅連納州（第三站），辯論已經變成私人攻擊，互指對方不是，素來牙尖嘴利，久歷沙場，打慣泥漿戰之前眾議院議長金里奇就佔晒上風，罵人罵得過癮，聽眾觀眾起哄，在如此情況下，嚴守摩門教教規，平時不飲可樂、不抽煙、不飲酒、不飲咖啡嘅羅姆尼就變成靠邊站人物。一場辯論之後，在南卡羅連納州民意調查領先幾個星期嘅羅姆尼竟然在選舉大敗，金里奇大勝，金沙賭場老闆艾道遜私自捐出近一億港元支持金里奇，呢鋪真係買大開大。之後各人到佛羅里達州再戰，羅姆尼陣營索性大肆攻擊金里奇之陰暗面，再度領先。
香港有人話特首參選人應該參加辯論會，聽落好似幾啱，但何俊仁最初叫梁振英辯論，梁生當作聽唔到，懶理何生。梁生當何生冇到之餘，就向唐生開火，下戰書求辯論，唐生點會中計呀。三位先生並非參加政黨初選，目前正在爭入閘做候選人，入咗閘先至辯論都未遲，譬如奧巴馬在角逐時刻點會與金里奇或羅姆尼辯論喎，共和黨大會選出官方總統候選人之後，奧巴馬先至會派幕僚與共和黨談判總統候選人辯論細節。以香港情況嚟講，唐梁何還未成為候選人，有乜好辯論？待二月十四日選委提名開始後、確定到甚麼人係有資格嘅候選人，咁就可以將辯論會擺上議程嘞。
誰人難以入閘？相信一個都冇，三人皆會成為候選人，何俊仁有二百泛民選委鐵票，唐英年有各個組別嘅選委支持，梁振英就有不少隱藏性選委支持，復有民建聯工聯會嘅大量「同路人票」，入唔到閘先至算係爆大冷門。民建聯/工聯會好驚何俊仁參加辯論會得益最大，擴大曝光率，有利於佢參加超級區議員選舉，梗係力捧CY啦，何況民建聯/工聯會與CY都係走社會主義經濟路線嘅！
三人辯論會，相信一定有，平民無權投票，只希望三位仁兄在辯論會專注講政策講香港，唔好互相攻擊、互揭私隱！