曾志偉和黃百鳴每年都推出賀歲片，今年已是兩人第三年交戰，志偉領班的《2012我愛HK喜上加囍》連續三年票房勝對手，前晚舉行新春團拜時，風騷過人的志偉即寫下「宇宙剋星」，暗寸甄子丹孭飛的《八星抱喜》遇上馮淬帆即變宇宙最黑。
由曾志偉、馮淬帆（緊哥）、毛舜筠、黃宗澤和何韻詩等主演的賀歲片《2012我愛HK喜上加囍》，前晚在沙田舉行新春團拜，同時慶祝《喜》片成為港產片賀歲檔票房第一，票房截至前日《喜》片已超過1,500萬，反而巨星如雲的《八》片卻僅得920萬票房，還贏了謝霆鋒主演的《逆戰》。
其實今年已是志偉第三年迎戰黃百鳴的賀歲片，志偉更連續第三年贏對手，志偉在現場滿場飛，並興奮擺緊哥上枱，送上「宇宙剋星」四字給緊哥，並得戚說：「當宇宙最強遇到宇宙剋星，就俾緊哥一鑊搞掂佢，緊哥片酬家有幾千萬，仲會拍《葉問4》。」擺明寸甄子丹孭飛的《八》片票房不濟，搞到緊哥即尷尬表示要搭飛機走人。
事後緊哥受訪時直認不應拿這些開玩笑，他說：「我知甄子丹係邊個，唔知死得仲快啦，唔好話我嘅功勞，係我哋成班人，我唔係尷尬，咁會得罪人。」志偉即插嘴說：「你最紅嗰時，佢（指甄子丹）都唔知喺邊。」緊哥笑指自己年老，志偉即笠高帽讚他老而彌堅，又笑言以後拍片要找緊哥與甄子丹對打。
寸埋高志森
志偉強調今年是真正由頭帶到尾贏對手，他興奮說：「今年好開心，所有港產片都收得。」並揚言會兌現請演員到日本旅行的承諾。對於高志森批評賀歲片今非昔比，志偉即還擊指對方已脫離電影圈，並說：「佢啲笑料唔係家笑料，不過歡迎佢下年加入，我就會用焦媛同招魂，唔好等佢獨佔焦媛。」
採訪：楊潔雯
攝影：陳俊強
