劉德華和葉德嫻主演的《桃姐》先後揚威海外多個影展，該片鐵定3月9日在香港上映。去年華仔首天為《桃姐》開工，到深水埗一間老人院取景，一班老人家見到華仔開心到不願午睡，華仔亦識做即席獻藝哼唱粵曲。
劉德華、黃秋生和宮雪花去年在深水埗一間老人院拍攝《桃姐》，華仔的魅力連院中老人家也為之傾倒。華仔一現身，不少老人家都半信半疑，華仔一臉笑容回答老婆婆說：「我係劉德華呀！」當得知猜中眼前人是劉德華後，一班老人家竟嚷著看拍戲，不肯午睡，令整間老人院也熱鬧起來，華仔還哼起粵曲來給這班精靈粉絲作餘慶節目。
花姨廣東話搞笑
華仔笑說：「家有一老，如有一寶，我眼前豈不有很有多寶物！其實嚟到老人院拍攝之前，都擔心會唔會打擾到一班老人家嘅生活，怕影響佢哋嘅休息時間，但家可放心，原來佢哋大部份都係好活潑。」
飾演老人院老闆的黃秋生和主管宮雪花，也給大家帶來不少歡笑。講廣東話口音不正的花姨，將短短一句「無證南亞裔人士」，讀成「茅震藍眼淚淫士」，笑爆全場。她說﹕「自知演技不及兩位影帝秋生和華仔，但難得有機會合作，開早班都難不倒我。」她專登吩咐菲傭煲定紅豆沙給劇組作飯後甜品，認真細心。
秋生造型姣得起
戲中戴眼罩、披長褸的秋生，坦言花了很多心思在造型上，秋生說﹕「試造型時貪得意髹咗黑色指甲油，阿Ann（許鞍華）見到覺得造型上可以玩味啲，索性髹晒十隻手指，之後揀咗件長褸配襯，更加突顯老闆嘅威風。點知開工時左眼發炎，靈機一觸戴個眼罩遮住紅眼，姣得順眼嘛？嘻！」華仔也笑稱只有秋生才如此姣得起，正好跟宮雪花的俏氣相映成趣。撰文﹕丁寧