輸波事小，最重要士氣不損、鬥心仍在！紐卡素剛戰足總盃出局，幸有領隊企出嚟捱義氣護短；周中返聯賽快車，望打爭氣波，平手盤高水，再博他們作客打敗另一東北兵布力般，終止兩連敗。
小弟有睇足紐記敗走白禮頓嘅全場，有幾次入波機會，但整體發揮嫌進攻欠銳，未有必勝決心，結果無厘頭輸個烏龍波出局，等唔到兩把非洲尖刀回來助陣爭盃；賽後班波俾傳媒踢爆，賽前幾天去咗西班牙，集訓兼度假夜蒲飲番兩杯。不過領隊柏度冇賴班球員，反而叫大家向前望，因為紐記仲排喺英超第6嘅有利位置云云。
賽事打得密也遙遙長路，盡快忘記失敗懶理無謂批評方為上策。紐記對手布力般，長期徘徊下游，軍心之亂從未停過，只間中能製造驚喜，但有運也不能撐成季。執筆時未知隊長基斯杜化森巴能否如願喺轉會窗關閉前獲准轉會，亦唔知班波上周末免踢足總盃會唔會雪到硬晒。只知布力般今季主場僅3勝8負，對上主場聯賽踢少個贏作客差劣嘅富咸，可一不可再。
而紐記今季作客不敗率逾6成，中堅高洛仙尼傷癒復出，若兩位喺非國盃hea踢嘅塞內加爾尖刀丹巴巴亞及柏比斯施斯（告別戰對利比亞各踢半場）趕及回英助陣；就算中場好手卡比耶上仗動粗被秋後算賬，最終不作上訴無緣今戰，平手盤高水，捧客軍坐和望贏信心度仍高。紐記季中繼續擴軍，不信今季勁勢就此滑落。
輸波不賴球員不賴貼士欠運，還有一個堅信自己、對球員極袒護嘅係阿仙奴領隊雲格；espn那位評述足總盃阿仙奴對維拉嘅專家，指雲格對半場落後維拉兩球後，一定喺更衣室痛鬧班小兵，致下半場表現脫胎換骨。但禾確特爆料，實情係尹佩斯喺更衣室發揮大佬本色，勉勵隊友反撲；也從直播睇見「國王」亨利整個下半場企喺場邊熱身，志在指手劃腳近距離向一眾師弟即時提場。
同度患難，終反底成功，阿仙奴最重要傷兵潮漸過，阿迪達及沙格拿上仗末段上陣得以輕抒腳頭，今場料齊擔正；保頓上仗只贏遇弱即縮嘅紅軍，未證明太多，翻查今季主場敗仗多輸兩球或以上，冷選試博阿仙奴重拾信心，鬥攻下大炒主隊。
下次見報（4/2）
蘋果波神
今日重心推介
熱選
紐卡素(平)
冷選
阿仙奴勝[-1]
(2.62)