潮人icon黃偉文（Wyman）近排獲Catalog邀請，將佢嘅肖像卡通化印製潮tee發售。Wyman雖然忙於為本月9號嘅紅館騷綵排，但佢日前都抽空着住其中一款限量50件嘅潮tee影宣傳相，仲襯埋黑色斗篷、手袖同紳士帽，望落去似足大碼哈利波特。
四圍撲衫
影相當日Wyman非常緊張，佢選用咗著名攝影師PaulTsang操刀，仲有本地插畫家TelephoneFung同RexKoo主理背景設計，將卡通Wyman嘅打扮搬上身，只欠副眼鏡就倒模哈利仔，好鬼馬。
Wyman話呢啲衫全部係佢衣櫃嘅珍藏：「我同攝影師、化妝師好熟，效果一定有保證，場景都好有心思，我好滿意呢輯相，亦好鍾意件T恤，希望將來同呢個班底有更多機會合作。」
演唱會就嚟開騷，Wyman心情仲緊張，佢噚日話：「新年我都周圍飛，忙於幫演唱會嘉賓搵衫，仲有好多衫未落實。」