印度超級足球聯賽喺本月25號開波，踢到4月8號，日前搞咗個球星拍賣會，等大球會可以揀心頭好，結果基斯普以最高價84萬美金（約652萬港元）成交；但講到競投最激烈嘅反而係皮利斯，比底價高出8.5萬美金，長時間踢過英超，果然唔同啲。
印超聯拍賣會前日舉行，阿根廷前鋒基斯普成為「標王」，球會巴拉錫出價84萬美金將佢收歸旗下；但呢個原來係基斯普嘅底價，唔通其他球會認為佢唔值，先唔同巴拉錫爭？相反06年幫意大利奪世盃兼贏埋嗰年世界足球先生嘅簡拿華路，就好多球會爭，由底價78萬美金嗌到83萬，最終俾西里古里搞掂；西里古里仲用20萬美金，買咗玻利維亞名宿、「魔鬼」艾芝華利番嚟做教練㖭！
效力過阿仙奴6季嘅皮利斯亦好搶手，佢底價71.5萬美金，最後以80萬美金成交，睇嚟新老細霍拉對佢好大期望。至於尼日利亞中場奧高查就冇人bid，結果要杜加浦以55萬美金啃咗佢；聽講杜加浦原先想要科拿，但爭輸俾加爾各答。
