A股紅盤反高潮，高開5大點之後就一直向下走，最後仲以接近全日低位收市，再失守2300關；港股連升6日後亦借勢回落，短線要睇住10日線19800水平，守得住的話，相信屬於大漲小回格局。
渣打馬拉松嚟緊呢個星期日舉行，贊助商由NewBalance變咗特步（1368），雖然件跑衣俾人彈到一文不值，但特步響朵係事實，可以喺呢個年度嘅盛事分一杯羮，宣傳效用好過賣電視廣告。事實上，體育用品股舊年壞消息盡出，股價殘到無倫，只要有些微好料滲出嚟，隨時會跑出。
睇PE，龍頭股李寧（2331）同安踏（2020）介乎8至9倍，特步5倍唔夠；論息率，李寧同安踏只係4.7及6.4厘，特步就接近10厘。
花旗早排睇淡眾體育用品股，惟獨推介特步，證明物有所值。特步噚日收報2.53元，跌1.6%，以舊年跌浪反彈0.236倍計，目標3.10元，潛在升幅23%。
唐牛