歐美股市上周五先後腳軟，港股連升6日後回調非常正路，但弊在A股紅盤低收，加埋特首淆底論，二萬關能否保住有難度，宜先暫避，若守住二萬可繼續挾高，否則今次小陽春有機會提前玩完。
今輪升浪主要由中資股帶動，背後主觀願望是阿爺放水，點知等極未見中央出手，唔對路自然沽貨走人。對息口最敏感的內房股及資產股，噚日跌勢最急，中資金融股亦跌2至3%，是否純粹獲利回吐或轉勢，等多一兩日自有分曉。
客觀分析，早前升浪其實未有實質基本因素支持，且傳聞多是自吹自擂，如國家隊入市、社保基金買貨，都是空穴來風。雖則中央救市心切，但估計要等歐債危機初步解決後，阿爺至肯出招，否則盞嘥子彈。
另外，中資企業近月陸續發放業績預告，整體而言，下半年成績大倒退。噚晚中鋁（2600）、馬鋼（323）及鞍鋼（347）齊齊發盈警，相信今日中資股會被質多幾腳，博反彈未到時候。
A股龍年開閘脫腳，內險股被潑冷水，由於投資收益為保險股主要收入來源，去年A股喪跌逾兩成，業績唔慌好睇，今年亦開市不順，恐繼續成為淡友炮轟目標。
新華人壽業績看淡
新華人壽保險（1336）去年底以28.50元招股，上市即遇冷風潛水，上周浮水但昨日再破發。港交所宣佈本周四開始，新華人壽及周大福（1929）將列入可沽空名單，或成為後市不明朗因素之一。
早兩周新華人壽由25元起步，累彈兩成、逼近30元，主因保薦行齊齊唱好，高盛睇42.20元、滙豐睇45蚊、瑞信則唱高至35元，大行吹雞股價當然有好反應，但事實是否如此，心水清者應該知道。
彭博綜合券商預測，新華人壽去年預測PE為20倍，市賬率2.23倍，估值與國壽（2628）相若，惟較平保（2318）及太保（2601）PE折讓超過一成。雖然新華人壽2008至10年保費收入年均複合增速達30%，領先同業，但有大行懷疑去年增長率開始急速放緩，今年A股形勢不妙，現階段買保險股，似乎唔多保險。
王昇
本欄逢周二、四刊登