為期兩周嘅澳網曲終人散，見證人生變幻無常，昔日甜心變籮底橙，女單格局仍然亂過亂世佳人；男單新人湧現，不過一到4強，仲係Big4天下。戰情激烈，但都唔及場邊一大堆花邊咁過癮。
文：鑲白旗
最爛
06年亞軍巴達迪斯今屆做唔成「巨人殺手」，但「掟拍王」美譽，佢認第二，冇人敢認第一。男單次圈佢發老脾，一口氣掟爛4塊拍（左圖），可能佢諗住啲拍有贊助啩！每塊拍市價成2,000蚊港幣，佢就只係俾賽會罰800美元（約6,000港元），抵到爛！
最曳
19歲澳洲新星湯密今屆打入男單16強，人氣急升嘅佢原來係「麻煩司機」，上周四澳洲國慶日，佢揸住架寶馬喺黃金海岸飛車，連續兩次冇理警察命令停車，收咗300澳幣（約2,400港元）告票不特止（圖），仲話班差佬無理取鬧，要搵律師打官司喎！
最廢
禾絲妮雅琪（圖）喺女單8強輸波後，再次證明佢唔識贏大滿貫，史上最廢「1姐」之名走唔甩；但出局對禾琪嚟講係好事，因為佢終於唔使再做「1姐」，變咗「阿四」。禾琪賽後死撐話自己仲後生，遲早會再「坐正」，球迷即管放長雙眼睇吓點。
最後
打埋今年可能又收山嘅史施達絲，雖然4強出局、衞冕失敗，但贏到唔少掌聲；代表作係16強對李娜，強忍拗柴痛楚（圖），連救4個決勝分反勝，令娜姐淚灑記者會。「阿金」家得28歲，唔少人都唔想佢咁快退休湊女，唔知佢會唔會回心轉意呢？
最靚
請咗名宿蘭度做教練嘅梅禮，成績冇乜突破，4強止步；但佢女友施雅絲（圖）場場落力打氣，唔少睇電視直播嘅球迷都讚佢靚女。不過英國傳媒爆料，話施雅絲2010年大學畢業後，一直唔搵工，一味靠有米男友接濟，可能想做「跟得女友」啩！
