自從「硬殼」做咗公仔箱新老細之後，佢公司旗下一班藝人喺公仔箱亮相嘅機會亦隨之而激增，好似「易發達」近排頻頻有機會做大騷，組合「H2O」竟然大大個樣喺公仔箱部喜慶片《㷫上加㷫》海報出現，反而其他有份客串、知名度高幾班嘅嘉賓只係得名而唔見樣。有人以為係硬殼落柯打要公仔箱捧H2O，但聽聞其實係「數字小姐」懶醒，諗住討好硬殼所以做埋呢啲擦鞋工夫。不過，聽聞八嬸睇到張海報之後激到噴火，話部戲要賺錢，梗係擺晒最紅嗰班嚟做賣點，點會將H2O嘅相放到主角咁大。八嬸為咗呢單嘢鬧爆數字，名副其實㷫上加㷫。
撰文：關仁