內地女模徐靖雯昨日帶病現身尖沙嘴新太陽廣場賀年活動，她透露剛從北京賀歲回港：「噚日先喺北京返嚟，之前剝完智慧牙，喺北京牙痛，去咗醫院做點滴，都算係犯太歲，好多嘢都食唔到。」會否效法廣東人去攝太歲，她笑說：「都唔知係乜嚟，不過都會拜吓。」問她緋聞男友周子揚有否心痛，她說：「佢知道，心唔心痛就唔知，佢有叫我小心啲，好在喺北京有媽咪照顧。」
自稱單身
問到新年有否到周子揚家拜年，徐靖雯說：「大家係好朋友，未去到呢個程度。」她又透露表哥將會閃婚，問會否心郁郁，她說：「唔心急，自己都想專注事業，今個情人節都應該係單身過，都連續過咗幾個，會搵埋啲朋友一齊過。」
採訪、攝影：林嘉慈