早輪電視劇《天與地》好hit，估唔到喺英超球隊利物浦亦上演前鋒天與地，今季一直備受冷落嘅古積特，憑住喺上周六嘅英足盃一腳送咗曼聯出局，紅軍即刻話唔俾佢轉會；反而喺上年年初高價買入嘅安祖卡路爾，因冇貨交，隨時被送番去紐卡素。
「悔將古積特當後備」
喺上周六嘅英足盃第4圈，利物浦主場以2:1淘汰曼聯，4日之內於本土盃賽擯走曼市兩大勁旅，認真唔講得笑，其中後備入替為紅軍射入絕殺球嘅荷蘭前鋒古積特，更可望憑住呢一腳，繼續留隊。因為古積特喺下季季尾就同利記滿約，所以盛傳包括羅馬同費倫天拿等幾支意甲球會都想搵佢過檔。不過，古積特喺上周六打破咗近4個月入球荒之後，搖身一變成為球隊重要棋子，佢嘅經理人贊臣話：「利物浦話叫古積特唔好諗轉會嘅事，因為佢哋係唔會放人。」
連杜格利殊喺賽後亦大讚古積特：「如果我一早將古積特列為正選，我哋喺上半場已經可以搞掂對手！」古積特就行情看漲，但另一紅軍前鋒安祖卡路爾就繼續冇貨交，佢對上一次聯賽入波，已經係舊年10月嘅事，而近5場都冇波入。喺賽後記者會上，有記者仲特登問杜帥點睇卡路爾嘅表現，杜帥就語帶相關咁話：「安祖，做得好！安祖卡路爾嘅制空能力好好，不過佢仍然要啲時間融入球隊，我哋對佢要比平常人更加有耐性。」
安祖卡路爾換丹巴巴亞
連杜帥都咁講，唔怪得最近傳紅軍雖然喺上年年初先以3,500萬鎊（約4.3億港元）買佢番嚟，但都諗住割愛，之前已傳會將佢攞去交換曼城嘅泰維斯，日前又話紅軍會攞佢嚟交換紐卡素前鋒丹巴巴亞。由於丹巴巴亞嘅買斷費只係1,000萬鎊，如果真係成事，紅軍咪即係送咗2,500萬鎊俾喜鵲使？