新世界百貨（825）係呢期系內落後股，有得諗。新世界系包括旗艦新世界發展（017）及內房新世界中國（917）好靚仔，由上年年尾到呢期高位，最高升咗37%及17%，而新百貨就打橫行，無郁過。又睇番新百貨，家陣PB1.4倍左右，與同業上兩倍至7倍PB比較，新百貨亦係平咗一截。又新百貨揸住淨現金近42億銀，喺阿爺調控期之際，有得守，兼大把銀彈發圍擴展，冇有怕。再講，新百貨跌到得單位數PE，已經唔係貴，而呢期阿爺已經有聲氣放水，隨住緊縮政策一轉向，內需市場搞活，新百貨應該有排肥仔水。新百貨一跌落橫行底4.40元，兜一轉，追番阿媽新世界上30%升幅，見5.72元，PB未有耐上到同業水位。
保華現金牛睇0.3元
保華集團（498）最新NAV1蚊雞，集團現價（0.19元）大幅折讓81%，誇張到不得了。而保華現金高達20億銀，淨貸款比率得11%，又係另一隻現金牛，能攻亦能守。又保華2012年半年度純利3.3億銀，已經超過11年純利2億銀，嚟緊年度業績，亦坐定粒六。冷吼保華，NAV折讓收窄到70%，現價係要翻過半番到0.30元。
錢雋